Verkefni

Núverandi og fyrrverandi starfsmenn hittust í kaffinu til að fagna afmæli Tréverks og gerðu kökunum góð skil.

Þann 1. október 2022 eru 60 ár liðin frá því Tréverk ehf. var stofnað. Á þessum sex áratugum hefur fyrirtækinu vaxið fiskur um hrygg og er ekki ofsögum sagt að vöxtur þess og viðgangur sé samofinn sögu Dalvíkurbyggðar. Þar hefur frá upphafi verið þungamiðja fyrirtækisins en á síðari árum hefur það einnig tekið að sér stór verkefni í nágrannabyggðum. Mikill meirihluta verkefna Tréverks frá stofnun fyrirtækisins hefur verið á Norðurlandi, frá Fljótum og austur í Þingeyjarsýslur, en einnig má nefna viðamikil verkefni austur á Reyðarfirði.

Að stofnun Tréverks fyrir sextíu árum stóðu fimm sjálfstæðir trésmiðir; Aðalberg Pétursson, Bragi Jónsson, Hallgrímur Antonsson, Ingólfur Jónsson og Sveinn Jónsson. Ingólfur var fyrsti framkvæmdastjóri Tréverks og gegndi starfinu til ársins 1981 en þá tók Bragi Jónsson við og var framkvæmdastjóri í átta ár, til ársins 1989 er Björn Friðþjófsson, núverandi framkvæmdastjóri, tók við og hefur því stýrt fyrirtækinu í um þrjátíu og þrjú ár.

Nú eru sex hluthafar í Tréverki: Björn Friðþjófsson, Guðmundur Ingvason, Hafþór Gunnarsson, Ívar Örn Vignisson, Kristján Elí Örnólfsson og Rögnvaldur Skíði Friðbjörnsson. Í stjórn fyrirtækisins eru Rögnvaldur Skíði Friðbjörnsson, formaður, Guðmundur Ingvason og Hafþór Gunnarsson.

Frá upphafi hefur fyrirtækið verið til húsa að Grundargötu 8-10 á Dalvík þar sem eru skrifstofur og trésmíðaverkstæði. Hjá Tréverki eru nú 25 starfsmenn í fullu starfi. Yfir sumartímann, þegar jafnan eru mest umsvif í útiverkum, starfa um 30 starfsmenn hjá fyrirtækinu.

Það fer ekki hjá því að á sextíu árum er verkefnalisti Tréverks langur; íbúðarhúsnæði af ýmsum toga, atvinnuhúsnæði og opinberar byggingar. Fyrsta stóra verkefnið var bygging orlofshúsa á Illugastöðum í Fnjóskadal fyrir verkalýðsfélögin í Eyjafirði á sjöunda áratugnum. Af stórum verkefnum á Dalvík má nefna Ráðhúsið, verksmiðjuhús Sæplasts, Dalvíkurskóla, Svarfdælabúð, íþróttamiðstöðina (íþróttahús og sundlaug) og Menningarhúsið Berg. Stór verkefni á Akureyri hafa t.d. verið viðbygging Háskólans á Akureyri við Sólborg, íþróttahús Síðuskóla, nýbygging Húsasmiðjunnar, ýmsir verkþættir við byggingu verslunarmiðstöðvarinnar Glerártorgs, breytingar á húsnæði gamla Iðnskólans á Akureyri í Icelandair hótel og stækkun Dvalarheimilisins Hlíðar. Utan Eyjafjarðar skal getið um byggingu lúxushótels á Deplum í Fljótum.

Á sextíu ára afmæli Tréverks er verkefnastaða fyrirtækisins góð. Stærsta verkefnið er breytingar á einni álmu Glerárskóla á Akureyri. Í þeim felst endurnýjun á þaki, endurinnrétting álmunnar og viðbygging. Því verki á að skila í júní 2024. Fljótlega hefjast framkvæmdir við byggingu parhúss við Hringtún á Dalvík. Í byrjun október lýkur Tréverk umfangsmiklu viðhaldsverkefni á Dalbæ – heimili aldraðra á Dalvík.

Á þessum tímamótum fara starfsmenn Tréverks og makar í afmælisferð til útlanda þann 26. október nk. Þá hefur stjórn fyrirtækisins ákveðið að í tilefni af 60 ára afmælinu verði tekin saman saga Tréverks frá stofnun þess. Óskar Þór Halldórsson, fyrrverandi blaða- og fréttamaður, hefur tekið verkið að sér. Öflun heimilda er þegar hafin og verður unnið að verkinu á næstu mánuðum.

Tréverk hefur hafið byggingu á 7 íbúða húsi við Jóninnuhaga 6 á Akureyri. Stærð íbúða er frá 53 fm að 104 fm og eru sérstaklega hannaðar með hagkvæmi í huga.

Tréverk hefur lokið uppsteypu á sökklum fyrir nýja verslun Húsasmiðjunnar við Freyjunes á Akureyri.

Á næstu vikum verður reist glæsilegt verslunarhúsnæði ofan á þessa sökkla.

Tréverk hyggst byggja parhús við Hringtún 11 á næstu mánuðum. Hér má sjá útlit og afstöðumynd af fyrirhugaðri byggingu.

Nú á dögunum lét Óskar Pálmason af störfum hjá Tréverki eftir rúmlega 53 ára starf.  Á þeim tíma hefur hann að einhverju leyti komið að byggingu eða viðhaldi meirihluta af húsnæði í Dalvíkurbyggð. Boðið var upp á tertu í tilefni dagsins og fékk Óskar að sjálfsögðu að skera fyrstu sneiðina.

Tréverk ehf þakkar Óskari fyrir vel unnin störf í gegnum tíðina og óskar honum velfarnaðar í framtíðinni.

Það er af sem áður var.    Blíðviðrið notað til að steypa allar þrjár botnplöturnar í Hringtúni 9. 

Sundlaug Dalvíkur

Föstudaginn 10 mars skrifuðu Björn Friðþjófsson, fyrir hönd Tréverks ehf og Bjarni Th. Bjarnason, fyrir hönd Dalvíkurbyggðar, undir samning um viðgerðir og endurbætur á Sundlaug Dalvíkur. Verkið hefst 27 mars n.k. og áætluð verklok eru 18 júlí.

Síðasta haust hóf Tréverk ehf. byggingu á þremur 16 íbúða húsum við Austurbrú á Akureyri. Húsin verða þrjár hæðir og kjallari. Einnig fylgir bílakjallari með hverju húsi. Íbúðir í húsunum eru 60-130 fm og áætlað er að fyrstu íbúðirnar verði afhentar næsta haust. Tréverk er verktaki við bygginguna.

. 

17 íbúðir í fjölbýlishúsi við Ásatún í Naustahverfi á Akureyri.
Afhent í sumarlok 2016

Deplar í Fljótum í Skagafirði er 2600fm2 glæsihótel, byggt af Tréverk 2014-2015.

Krílakot er leikskóli á Dalvík. Tréverk ehf. reisti 450fm viðbyggingu við skólann sem var vígð í byrjun ágúst 2016.